Was soll’sch’n mit’n Manne,
isch hab dor een Hund.
Von dem isch misch ni drenne,
da gibbt’s ooch genen Grund.
Dor is so schlau und helle,
versteht e jedes Wort.
I: Mit munterem Gebelle,
grüßt er an jedem Ort.:I

Er liebt mich wie sonst keens,
bin isch ooch noch so rund.
Bei ihm bin’sch de Nummer eens,
er is e gudder Hund.
Tät isch ihn ma verstoße,
er gäm zu mir zerick.
I: Bei däm drach isch de Hos’n,
isch hab e großes Glick.:I

Er häld mir ab de Männer,
isch sindische ni mehr.
Er is e gudder Genner,
mein Herz is rein un leer.
Nach friehestens 10 Jahren,
gibbt der ’n Freßnapp ab.
I: Mit eenem Viech mit Hooren,
steh’ isch an seinen Grab.:I

Nu habb’sch eene Gatze,
sie schmust so gern mit mir.
Off mein’r Fellmadrazze,
nee so e sieses Dier!
Sie gibbt mir ihre Liebe,
drei Schunge had se bald.
I: E Gätzsch’n had ooch Driebe,
se is noch nisch ze ald.:I

Ooch isch liebe das Eene.
Es machd misch wied’r jung.
Da ziddern meine Beene,
heer isch don Rogger-Song.
Dann geh’ isch o ma tanz’n,
vergess’n is mei Schmerz.
I: Isch will mich ni verschanz’n,
mor had dor ooch e Herz!:I

F.Mastles Berlin, 31.05.2003
Sächsische Mundart Hans Fuhrmann
Dresden, 22.07.2003